التصوير📸🌸🌱.

أهلاً يا أصدقاء . .

هالتدوينة بتكون خفيفة لطيفة بإذن الله.

بأحكي لكم عن التصوير بالجوال ، كيف نحصل على لقطات تنافس لقطات الكاميرات الإحترافية بعدسة الجوال الصغيرة وإمكانياته المحدودة ..

تصوير بالكاميرا العاديه او في الانستغرام والسناب تشات. .

في اعتقادي ، جمال اللقطة يعتمد على المصور أكثر من اعتماده على الجهاز ، مانحتاج كاميرا غالية أو أحدث أيفون حتى نطلع بصورة جميلة واحترافية..

لكن قبل كل شي لازم تكون عندكم خلفية عامة عن التصوير ، اختيار الزاوية الصحيحة ، الإضاءة وترتيب مكان التصوير وهالأمور الجميلة . .

ولذلك في هالتدوينة بيكون التركيز على الأمور التقنية للحصول على صور جميلة بجودة ووضوح عالي أكثر من التركيز على النقاط الذوقية في التصوير

 أساسيات التصوير بالجوال
(بعض الخطوات صالحة لكل الأجهزة ، وبعضها خاص بالأيفون لأنه هو اللي أستخدمه)

أجمل شي في التصوير بالجوال انه تلقائياً يضبط الإضاءة والإعدادات بما يتناسب مع الجو ..
لكن فيه عدة نقاط نسويها تساعد من تحسين اللقطة بشكل هائل

أولا : ثبات اليد

أهم نقطة للقطة ثابته هو ان الجوال يكون ثابت قدر الإمكان ، دائما ابحثوا عن مكان تسندون عليه الجوال بدلا من التقاط الصورة ويدكم في الهوا، تثبيت اليد الممسكه بالجوال على طاولة مثلا يكفي ، لكن الأفضل ان الجوال نفسه يكون مستند على شيء جامد ، وبلمسه خفيفه بيدك على زر التقاط الصورة ، بحيث مايكون فيه ولا نقطة اهتزاز..
هذي الحركة بتعطيك صورة حادة جداً ..

ثانياً: التركيز (الفوكس)

الجوال أول ماتنفتح الكاميرا للإلتقاط يحاول يركز اللقطة على المنتصف ، لكن أحياناً ماينجح ، ويركز على شي ثاني،

بلمسة خفيفة على الشاشة اضغطوا الجزء اللي تحبون ان التركيز يكون عليه ، بيطلع مربع أصفر مكان الضغطة، انتظروا حتى يتم التركيز وبعدها خذوا اللقطة ،

وهذي الحركة جمييلة لتصوير الأشياء القريبة ، أحيانا تقربون الكاميرا من الغرض المراد تصويرة وتصير غير واضحة لأنه يركز على شيء أبعد ، بس لو انتظرتوا شوي ولمستوا الشاشة أكثر من مره بيتم التركيز على الهدف وبيكون واضح بينما تكون الخلفية ضبابية وجميلة جدا ..

استخدام عكسي لميزة الفوكس:

ممكن إذا حبيتوا الصورة تكون كلها غير واضحة تحطون يدكم قريب من كاميرا الجوال وتخلون اللقطة مركزة عليها ، وقبل ماتاخذون اللقطة تبعدون يدكم وتصورون .. بحيث تكون الصورة مو واضحة

ممكن تتساءلون ، وش الهدف من صورة غير واضحه ؟؟
هنا يطلع إبداعكم في استخدام الفكرة لتكوين صور جميلة

مثال :

هذا منظر شارع جميل قبل إبعاد الفوكس

الصور الضبابية تطلع لكم أنوار الشارع على شكل دوائرضوئية وفي أحيان كثيرة يكون المنظر جدا جميل..
خاصة مع وجود مطر أو أنوار شموع وإضاءات الشوارع

ثالثاً: الإضاءة

نفس الخطوة السابقة ، إذا تحبون الإضاءة تكون عالية ، اضغطوا على أي جزء غامق في الشاشة وبسرعة بتنور اللقطة وترتفع إضاءتها ..
لكن إذا المكان الغامق مو هو نفسه المكان اللي تحبون التركيز والحدة تكون عليه ،
فأولاً ، اضغطوا على المكان المطلوب التركيز عليه بنفس الطريقة السابقة ، وبعدها بسرعه اسحبو اصبعكم على الشاشة تحت او فوق ، وبتلاحظون الإضاءة تتغير لكن التركيز ثابت على نفس النقطة المطلوبة ..

ملاحظة: ما أنصح برفع الإضاءة بهالطريقة في معظم الأحيان ، لأننا نقدر نرفع الإضاءة لاحقاً بشكل جميل سواءا بتعديل الأيفون أو بالانستغرام .. لكن إذا رفعناها أثناء الالتقاط، وصار فيه بياض كثير في اللقطة الأصلية، مانقدر نتراجع ونخففها..

معلومة متعلقة بالتركيز والإضاءة:
بعد مانلقط اللقطة بترجع الكاميرا للوضع الطبيعي ونضطر نضغط مرة أخرى على الغرض اللي نحتاج التركيز يكون عليه ..
لكن فيه حركة تسوي قفل على نقطة التركيز بحيث تكون نقطة التركيز اللي اخترناها ثابتة مهما أخذنا من لقطات ،
ببساطة نضغط الشاشة على المكان اللي نحتاج نركز عليه ونبقي اصبعنا ضاغط على الشاشة لمدة ثانيه او ثانيتين وراح تطلع علامة صفرا مكتوب عليها AF/AE LOCK وهذا معناته ان الإضاءة والتركيز تم قفلهم .. طبعاً هذي مفيدة جدا لو بناخذ عدة لقطات متحركه أو حتى لو بنجرب أكثر من لقطة لنفس الغرض بدل مانضيع وقت نعيد التركيز كل مرة .. أثناء القفل نقدر يدوياً نعدل الإضاءة ، لكنها ماراح تتعدل تلقائياً من الأيفون..

رابعاً : خيارات الإلتقاط

زر رفع وتقصير الصوت ياخذ لقطة أو فيديو، يعني مايحتاج تضغطون زر الالتقاط ، ممكن تضغطون اللي يغير الصوت وبيتم التقاط اللقطة ..

هذي المعلومة تكون مفيدة في بعض الحالات اللي أكون مضطره امسك الجوال بزاوية أو طريقة ماتسمح لي أشوف الشاشة وأضغط زر الالتقاط..

أيضاً طريقة أجمل ، ممكن تلتقطون اللقطة عن طريق زر الصوت الموجود في سماعات الأيفون، هذا بيزيد الصورة وضوح ، لأن الجوال حتى لو كان على حامل أو على سطح ثابت ، مجرد لمسة الأصبع لأخذ اللقطة بتحركه بشكل خفيف، بينما لو التقطنا اللقطة عن طريق ضغط زر الصوت في السماعات ماراح نهز الجوال وبالتالي صورة أكثر حدة.. أي إهتزاز لو خفيف جدا بيأثر بدرجة معينة على جودة الصورة..

خامساً: الالتقاط السريع أو الـ burst mode

هذي الحركة جميلة جدا إذا بتصورون حاجه سريعة ، مثلا طائر أو شخص يمشي أو رياضة معينة وأي شيء متحرك..

عبارة عن التقاط عدة لقطات سريعة جدا جدا ورا بعض ثم نختار الصور الناجحة منها،

الطريقة : نستمر ضاغطين على زر الالتقاط وراح تستمر الكاميرا في الالتقاط لحد مانرفع اصبعنا عن الشاشة، بعدها نضغط select ونختار اللي أعجبنا من اللقطات ، ونختار keep favorite ، وبتنحذف كل الصور ماعدا اللي أعجبتنا ..

سادساً: ملحقات التصوير

العدسات

مهما أبدعنا في الزاوية والإضاءة وكل شيء ، فيه عدسات تاخذ التصوير بالجوال لمرحلة مايمكن يصل لها بدونها ..

ومنها ، عدسة المايكرو (المكبرة) وعدسة الزوم وعين السمكة وغيرها من العدسات المخصصة للجوال ..

أستخدمت مؤخراً عدسة المايكرو المكبرة ، وكثير أرسلوا لي يستفسرون عن سر الوضوح في التصوير وكيف صورت أشياء صغيرة بزاوايا قريبة جدا، يعني الفرق واضح جداً حتى للعين اللي ما عندها خبرة بالتصوير ..

عدسة المايكرو متخصصة بتصوير الأشياء الصغيرة جداً، مثل الحشرات ، رموش العيون ، طرف القلم ، خيوط الملابس ، وغيرها من الأشياء اللي ماترى تفاصيلها بالعين المجردة .. بينما بدون عدسة مانقدر نقرب كثير من الغرض اللي نحتاج نصوره، لأن إذا اقتربنا ماتطلع الصورة حادة ، تطلع ضبابية ..

والجميل انها تعطي خلفية ضبابية صافية وجميلة جدا تنافس التصوير بالكاميرات الاحترافية..

بعض لقطات عدسة المايكرو (صور بدون أي تعديل) :

ملاحظة : عدسة المايكرو غير قادرة على الالتقاط عن بعد ، لازم نقرب العدسة جدا لموضوع التصوير وتكون شبه ملاصقه له ، لذلك مانقدر نستخدم العدسة لتصوير الأشياء البعيدة

الثاني من ملحقات التصوير

الحامل الثلاثي

الحامل ممتاز للتثبيت في مكان معين وتصوير فيديو ، ويخدم أكثر شي اللي يحبون يصورون طبخاتهم أو رسوماتهم فيديو وهم يشتغلون..
اللي عندي جدا ممتاز وقوي ، والأرجل حقت الحامل تتشكل بأي شكل بحيث نقدر نلفها حول شيء ونخليها تتمسك فيه وتتعلق،

أخذته من هنا 

لكن فيه شيء ما أعجبني ، انه مايمسك الجوال بشكل طولي ، فمثلا ما ينفع أصور به سناب ، يمسك الجوال بشكل أفقي فقط ، فلو بغيت أصور بالطول لازم اثبت الأرجل على جنب..

وأخيرا أحد ملحقات الجوال اللي ماله علاقة مباشرة بالتصوير لكنه يساعد على ثبات الجوال في يدي، الدائرة اللي عليها رسمة فضاء ..

مجرد اكسسوار يساعدني أمسك الجوال مثل المطاط المنتشر للجوالات ، حبيت أجرب شي جديد بعد ما خربت القطعة المطاطية اللي عندي ..

 أعجبني فيه انه إذا مابغيت أستخدمه ممكن أضغطة على جوا ويصير مسطح ماياخذ مساحة وله شكل جميل ،

واللي يميزه عن المطاط ، انه ممكن ألف حوله السماعاتواضغطه على جوا فيمسك لي السماعة ماتضيع ولا تطيح ..
وايضاً ممكن اثبته على الطاولة واتفرج شي بالجوال كأنه حامل ..

سابعاً : تعديل الصور

وأخيراً نقطة مهمة جداً وهي إخراج الصورة النهائي ، تعديل الألوان والإضاءة والحدة ..

التعديل ممكن من خلال الأيفون نفسه ، أو من خلال برامج التعديل ..

أنا أفضل أعدل صوري عن طريق الانستغرام ..

فبأشرح لكم بشكل بسيط تعديلات الانستغرام وغالباً تحصلوننفس الرموز في كل برامج التعديل

إضاءة الفواتح highlights (ترفع وتخفض إضاءة الألوان الفاتحه في الصورة)

رمزها :

هذي مناسبة جدا للصور اللي أغلبها لون أبيض ، زيادة البياض في الجدران أو المفارش وغيرها من العناصر البيضاء يعطي شعور بالنظافة في الصورة والمكان الملتقطة فيه ، لذلك بالرغم من نظافة المفرش في الصورة الأولى إلا إنه مايعطي شعور قوي بالنقاء مثل الصورة المعدلة..

وهكذا أكون كتبت لكم خلاصة خبرتي في التصوير بالآيفون ؟؟ أتمنى انكم استمتعتوا بالتدوينة📸🌱.